l.minor

有冇試過係街上不斷遇見同一個人呢？

最近兩個星期內，我不斷遇見同一個人，無論係咩野地方都遇見到佢，而大家又同一時間望到對方。

如果呢個人係一個靚女，我會覺得：「E…唔錯喎！」，就好似電視台"老作"出黎嘅偶遇老土故仔咁，跟手我講句：「E…乜咁arm呀？下次一齊食飯吖？」，不過，個故事唔係咁樣發展囉！而果個人究竟係乜水呢？

佢其實係我以前嘅一位tutor（係咪個故事即刻好唔吸引呢？），應該係咁，我本身唔係佢果班嘅學生，但我又會sit-in去佢果班，原先我果班嘅tutor係一位靚女，所以攪到堂堂爆滿，一班原先只有四十人攪到有八十幾人坐咗係度，最勁試過坐咗成百人，重要坐到出走廊，俾校工話，點解呢？因為邊有咁多櫈呢？全部都係隔離班房偷過黎，上完堂d友仔重唔走？唔通幫你搬番返去？重有就係果位靚女tutor好似黃婉曼咁，鬼咁精玲，攪到個班房個個都「跳出香港」、「熱血沸騰」，就係咁我就放棄咗個Miss，去到另一個原先有四十人上堂，但每次只見到十幾人嘅班房度上堂。係咪好「鄧」我呢位「偶遇」男tutor唔底呢？

其實係呢兩星期「偶遇」之前，我地巳經係太約一年前係地鐵上邊「偶遇」咗幾次，重記得第一次見到佢時，佢只係「啤」住我，係真架！佢只係識「啤」住我！直到我除低earphone，自我介紹番自己，佢就話我好熟口面，但又記唔起邊度見過，所以唔敢同我打招呼；估唔到最近又開始撞番佢，本來都係撞咗兩、三次，點知最恐怖事發生，我頭先去咗拎入台証，一出lift行入去門口，一望就見有條友仔熟口熟面，坐咗係櫈度，而果條友又同一時間望住我，呀～～又撞到呀！！！

我開始係度諗，去台灣時會唔會又同班機呀？住民宿呀、酒店呀，又係隔離房呀？跟坐去買手信又見到呀！佢究竟係咩野人黎架？