l.minor

下一站．．．後壁湖

無計過時間去後壁湖要幾耐，當日只顧睇路牌（其實都冇咩路牌），風景都冇咩特別留意，只顧抯好架車（渣架１００cc有幾難呢？），去後壁湖主要目的就係食超平魚生，１００蚊台幣有２０塊厚切魚生，其實當中唔只２０塊，食咗幾塊都仍多過２０塊，其實d魚生味道都唔錯，不過環境就一般啦！唔係個個頂得住，不過我地食完又冇肚痛，應該OK嘅！
原先下一站係去關山睇日落，可惜天氣麻麻地，所以決定聽日有時間先去，就係呢個決定就要下次先再去到關山啦！又係因為．．．

唔去關山．．．就係後壁湖海邊玩咗陣，
影下相，吹下風，唔好俾時間、景點拖住，先係我想去旅行嘅方式，去旅行都係想休息下，係咁追景點「到此一遊」，重辛苦過返工，為乜？

經過咗渣車去後壁湖一段路，自己渣車都放咗，偶途都有睇下風景，正值黃昏時間，雖然「咸旦王」欠奉，但天色都幾靚，有段路好想停低，就咁「劈」架車係一邊，影陣相先，因為個段路嘅樹呀，真係一流，好鬼靚！實物就影唔到，不過都重係個腦度，實物唯有等下次啦！


恆春「月光咖啡」

恆春有間叫「一杯咖啡」好似好出名，不過我地就冇試，返而去咗一間叫「月光咖啡」，見無人幫襯，都有d爭紮入唔入去．．．

坐低後老闆送上自制的餐牌，由於之前嘅「後壁魚生」仍未消化，所以只叫了兩杯咖啡，味道卻是出奇地好！濃濃嘅凍咖啡，唔會凍到心寒果隻，而老闆又唔會因為我地只叫兩杯咖啡，求其了事便算，認真程度就好似整「穿梭機」一樣，真係要俾個讚佢！
我地係咖啡店休息嘅同時，又有另一家人在門外，與老闆傾談，隔一陣就入咗黎叫食野，又見老闆好認真去整咖啡同小食，真係超讚！

出火？有得睇 無得玩

有人睇完我原先個schedule，問：「出火？出咩野火？」跟住在喪笑．．．當然我用了十萬分誠懇去解釋出火到底是什麼回事。
睇番網上提供的資料，去出火呢個地方，由恆春古城東門行去只係九百幾米，我地信以為真，想用兩對腳行去，好在還是回頭是岸，渣機車上去啦！行上去真係對唔住自己！

出火外邊有個停車場，由恆春東門直去，左手邊便找到，而外邊有間小賣部，係賣煙火、爆谷，而要去睇出火，就要係停車場右手邊的樓梯住下走，跟住用耳朵去聽最噪炒的方向去，就是了！因為大家正在放煙花，燒爆谷，不過我正想走回小賣部買煙花熱鬧一下的同時，警察就來了，不準大家在鐵圈的範圍內玩，好在我也帶備了電筒來玩light painting，不過由於電筒太光，over了。
出火除了出火有名外，亦都是觀星的好地方，其實還有其他的地方更好（好似叫龍盤定龍潭，但我沒有深究，因為兩個人去，都要顧下自身安全，瓜咗都無人知就唔好啦！），上次去零光害的地方巳忘記在那裡，不過今次再見到，既興奮，又珍惜。

由於時間關係，還要到墾丁大街食野及行街，但由於太早起身的關係，在墾丁大街走了一小段便想回民宿休息，跟著便帶著街邊小吃回民宿。