l.minor

水清嘅黃石碼頭

塔門對於我來講應該絕不陌生，初次踏足是中學時代，最叫我印象深刻就係後邊個草地大斜坡；那種永遠吹唔完嘅海風，夏天就算幾熱，坐係草地暴曬，都應該都唔會點出汗，而那面對大海嘅海境香港卻是少見，絕對稱得上係香港嘅秘景之一。有時都幾擔心地產商打塔門主意呢（之前話海下、大浪西都俾人睇中）？

塔門新嘅環島徑

係塔門遊玩，可長可短，個零鐘巳經可以行哂（唔計行d秘密路徑），短遊可以行巳經整得靚靚嘅路徑一週（以前要經過先人墓地），再係大草地訓一陣，再食下塔門嘅茶餐廳；至於想行耐d，可以行落去呂字疊石、龍筋頸，但就比較危險，唔太合一家大細行（當日我見到一個老豆同個仔，由呂字疊石下邊行上黎，但個斜坡接近60度，真係服咗佢地）。

塔門周圍都係牛

值得一提塔門嘅交通，由於尾班船出黃石碼頭係六點鐘（非常早呀！），所以都唔可以玩得太夜；當日由黃石碼頭坐96R去鑽石山，結果坐咗兩個鐘，因為當時正值繁忙時間，車龍由早禾坑塞到白沙灣，原因係好多人去西貢食晚飯（最近兩次路經西貢，人潮以及車龍比較起旺角更可怕），所以下次再入西貢真係要避開繁忙時間。

有對情侶係石灘吹肥皂波

之前成日想去塔門影相，結果影得好少相返黎，原因可能之前影得太多相（太多相似嘅相），所以唔想再影一d太相似嘅相，再加上果日似乎自己太心急，成日想影相，結果呢～心急，就永遠搵唔到焦點去影，下次再去，會放慢自己嘅心情，放遠一點自己嘅眼光 。